 اسمه ... أول مواطن شايل فى جيبه البطاقة البلاستيك
عمره ... مركب اتطوح في بحر عينيها بيسافرعنوانه .. ساكن الفجر اللى راجع مهما موج بحرك علي
صفاته ... مش جبان لكن يبان طيب قوي دايمًا يكون أبسط من الناس كلها لكن في نفسه بيكون قوي
حياته....عارف ان كله قابض
...لكن مرساله لحبيبته ..قوالة الشعر من غير ما ينسى حقه و حقها هو الشاعر .. أشرف توفيق رحنا له ولما وصلنا لقينا ابتسامة غريبة على وشه سألناه عن السبب رد فى ضحكة مخنوقة بضحك عشان شعري اتسرق على النت
ودي حاجة تخليك تضحك ؟
ده أكيد يثبت إن كلامي حلو و فرحت أكتر لما لقيت ناس معرفهاش قالوا ده شعر أشرف توفيق و دافعوا عنى
حاول يغير الموضوع قال لنا إيه رأيكم فى شوية شاى علشان نتكلم برحتنا
ممكن تعرف القراء بيك مش من واقع البطاقة ولكن انسانيا؟
إنسان عادى مصرى زى بقيت الناس أبويا فلاح قضى فترة طويلة فى الخارج
وأمي ست بيت وأنا أصغر اخواتي الخمسة ، حاصل على ليسانس آداب انجليزى
مش غريبة شوية آداب انجليزي مع شعر عربي؟
كنت من الأوائل بس فى الثانوية جبت 90% ف معرفتش أدخل كلية صيدلة اللي بحبها قلت أدخل آداب انجليزى على أمل اني أكون دكتور فيها
أول مرة حس فيها أشرف بطعم وحلاوة الشعر؟
سكت لحظة وهو بيفكر رد فى رابعة ابتدائى لما كنت بحفظ مقطوعات الشعر اللى عندى فى المدرسة
يا ترى لسه فاكر حاجه من الكلام ده؟
أنا فاكر قصيدة اسمها مأساة عصفورة لشاعرة اسمها جليلة تقريبًا
مساء الخير يا أختي مساء الخير يا جارة
وقفت هنا على الشباك أستجديكي منهارة
فهل ترضين أن تصغي بلا ضيق بلا ألم
وترتاحين آونة من الأوراق والقلم
وتستمعين في عطف إلى شكواي ياجارة
و طلعت من ابتدائي بعرف أقلد الكلام ده و دا ساعدنى فى الوزن والقافية
مين أول واحد شاف الشعر بتاعك ؟؟؟
كنت منغلق على نفسى شوية مكنتش بفرّج حد شعرى و كمان لأنى كنت خايف حد يعتبره تضييع وقت فكنت بشيله جوايا
رغم إن أهلى متعلمين لحد ما فى يوم واحد من أصحابى عرض كلام على مدرسنا أ/حامد طه وقال جملة لا أنساها....هيطلع من الكلام ده عبقرى شعر
امتى طلع شعرك للنور بجد؟؟؟
فى الجامعة فى نادى أدب كلية آداب اشتركت فى مسابقه النوابغ و هناك اتعرفت على الشعراء الشربينى شريده..شيماء السعيد و صديقى العزيز مصطفى الجزار اللى اقترح عليا نروح نادي أدب الجامعة
نقطة التحول لنادى أدب الجامعة ....هزتك؟؟
لا بالعكس دى كانت بدايتى الحقيقية لدرجة إن أول قصيدة قولتها زوجي شككوا فـ إنها مش بتاعتى
و دا كان الجميل إني اتولدت كبير وخلال سنة كنت بختم أغلب ندوات الجامعة
مشاركات أشرف المختلفة...؟؟؟
حصلت على المركز الأول فى شباب الجامعات فى أسيوط
المركز الأول فى مهرجان شباب مصر بقصيدة مرسال لحبيبتى
المركز الأول فى مسابقة قصور الثقافه بقصيدة لا يا بنتى
شاركت فى الخطابة فى أسبوع شباب المنيا و مشاركات عديده فى المنصورة
بتحب السفر؟
مش دايمًا لكن سافرت للخارج مرة واحدة مثلت مصر فى المهرجان الثقافى فى قطر فى ابريل2005
 
أشرف الانسان أثر وتأثر بإيه؟ ابتسم ابتسامة رضا الحمد لله الواحد اجتماعى بطبعه و طلعت بأعز أصحاب ليا في الدنيا
منهم مصطفى الجزار ، أحمد عبد الحى ، محمود عبد الرازق ، إبراهيم حندولة ، السرساوى ، البدرى ومن بره المنصورة عادل سلامه و على سعد
كلام قريته .......قلت دا الى جوايا؟؟
أحمد فؤاد نجم ... بلدى و حبيبتى أمل دنقل زرقاء اليمامة ، لا تصالح
محمود درويش ..يا دامع العينين فاروق جويدة اكتب ما شئت
أحمد مطر مفقودات
هل كتبت حاجة وكنت بتهدف لوصول فكرة معينة للجمهور؟
تقصد القصيدة الموجهة؟!! يبان كتير من كلامي إن كل قصيدة موجهة لكن ده مش حقيقى بس اللى كانت موجهة كله قابض
كانت عن العبّارة و اللى حركنى إني أكتبها كلمة سمعتها في برنامج من الناس اللى نجوا من العبّارة لما القبطان قال لهم
بسخرية انتو باين عليكو النهاردة رزق السمك
بتحط الناس فى حساباتك و انت بتكتب؟
طبعا وأساسى لأنك مهما كان بتقول القصيدة دى ليهم و الديوان هما اللى هيقرروا نجاحه...فلازم كلامك بيقى منهم و قلمك يعبر عن جرحهم قبل فرحهم
اتعرض عليك تكتب أغانى؟؟
آه من راديو وتليفزيون الجامعة و فى مغنى جديد اسمه شريف
بس أنا رفضت و لسه الموضوع بيشغل دماغى
مش هكتب أى حاجة و مش دلوقتى لأني لسه عاوز أوصل شعرياَ
وأرفض إني أكون مؤلف أغاني عشان أوصل للناس عشان كده مأجل الموضوع
امتى سكت قلم أشرف توفيق....و مقدرش يكتب؟؟
بقاله أكترمن سنة لأني طول عمرى مُقل فممكن أقعد أكتب فى القصيده سنة
ولأن استمرار النجاح مشكلة لازم أحاسب نفسى على كل كلمه بكتبها لأن الناس هتحاسبنى بعدها
ايه هي مشروعاتك الحاليه؟
شايف إن الشعر مستقبلى و كونى مدرس انجليزى مرحله انتقالية عشان أكل العيش وإن شاء الله فى خطتى انتقل إلى القاهرة
و أشترك فى مسابقة اقـرأ بمجموعة أعمال فصحى
مواصفات فتاه أحلام أشرف توفيق؟؟؟
ملتزمة عاقلة تتحمل فكرى لأني مختلف، مش بنت وخلاص .. يبان عليا هادى بس كلمة منى ممكن تزلزل الدنيا فلازم تكون متفاهمة
بتغير لما حد بيكتب شعر حلو ؟؟
آه بغير جدا وألوم نفسى ليه مكتبتش كلام زي ده لحد دلوقتي
بتخاف من إيه؟؟
بخاف إن حد يفتكر إن أنا انسان وحش ولو وصلنى الاحساس ده ممكن منمش
و أتألم لو فضل الظن ده جواه
لو واحد صاحبك سرق شعرك تعمل إيه؟؟
أنا غبي ....... للأسف هسامحه
الشعر و السياسة بينهم دايما خيط رفيع رأيك ايه؟؟
بحب أبقى حر نفسى وأؤيد فكرة المقاطعة و الحمد لله ملتزم دينيا
بس خفت أنتمي لأي اتجاه لأني حاسس انى هقصر وبالتالى هشوه الأصل
بمعنى أبسط أحب أكون حر نفسى عشان أتحمل أخطائى مش أخطاء حد تانى
الوسط الثقافى اللى حواليك ساعدك انت و جيلك؟؟
فى المنصورة الوسط الثقافى من أسوء الأوساط لأن الدواوين بتنزل بالمعارف و المحسوبية و المسابقات دائما بتروح في اتجاهات شخصية فالأدب محكوم بالسياسة و فى اتجاه دائم لتهميش الشعر
ايه دور الشعراء الكبار دلوقتى ؟؟
للأسف دورهم منعدم محدش بيقدم فرصة لحد
فكرة الطبطبة ويا ابنى ربنا يوفقك متناسبش كرامة الشاعر وأن يرفض كبار الشعراء استضافة
الشعراء الشباب فى ندواتهم حاجة مخجلة .. تجيب الاحباط
ناس عدت فى حياتك ترد عنهم بكلمة واحدة
محمد كمال عباس ....... أول من آمن بالموهبة
د/على ابو زيــــد ........ مشجى الأول
مصطفى الجـــزار ........ توأم شعرى
أحمـد عبد الحــى .......... أنــــــا
محمود عبد الرازق........ رخــــــــــــم
معنى كلمه أخف دم عند أشرف توفيق؟؟
ياه ده البلوج بتاعي ....الكلمه دى أطلقها عليا عادل سلامة و عايزها تكون اسم على مسمى فعلا
.jpg) مش شايف ان الكوميديا ممكن تضر الشعر أو تقلل من قيمته ؟؟
لأ .. اطلاقا ... أنا فى حياتى الخاصة كده و هفضل كده
لأننا مصريين بنحب الضحكة و القفشة.. كلها تلميحات كوميدية ساخرة
بتضحك لينا وعلينا وبينا وفينا..وده يمكن ظهر فى ناقص دبدوب،بخاف م الحكومة تحب الناس تفتكرلك ايه ؟؟
سرح شويه وقــال عايزنا نرجع زى زمان قول للزمان ارجع يا زمان
على مستوى الشعر مرسال لحبيبتى ....حقى و حقك... كله قابض ..استحملى .. بخاف من الحكومة
جه وقت و قلت يا ريتنى ما كنت شاعر؟
حصل فى تالته جامعة حسيت إنى زهقت كل كلامي بقى موزون بالذات
لما يطلب منى أكون قدام الناس كتير فبضطر أمثل
فبيكبر أشرف الشاعر على حساب أشرف الانسان وساعات كتير بتوه مني وبوحشني بجد انسانيا
هل انت راضى عن مشوارك ؟؟؟
جدا جدا جدا يمكن احسن من غيرى فى سن صغير
قدرت يكون ليا ندوات خاصة و اسمى مطروح فى الساحة الأدبية
يحيى .. حلاوة أحـمـد عـلـــي |
.jpg)
على فكرة الشعر اللي في الجوانب جامد جدا وواضح إن أشرف احساسه حاضر دايمًا
ربنا يوفقكم على مجهودكم